Tag Archives: அறுசுவை

அன்பற்ற அறுசுவை உண்டி பாழ்

விவேக சிந்தாமணி – 2.58
************************************
கெட்டசாறு தவிடுகஞ்சி கிருமியுண்ட மாவறைக்
—–கீரைவேர் தெளிந்தமோர் முறிந்தபாகு கிண்டுமா
இட்டசோறு கொழியலுப் பிடாதபுற்கை யாயினும்
—–எங்குமன்ப தாக நுங்க இன்பமாயிருக்குமே
பட்டபாகு பசுவினெய் பருப்புமுக் கனிக்குழாம்
—–பாளிதங்க டாளிதங்கள் பண்ணி காரவகையுடன்
அட்டபாற் குழம்புகன்ன லமுதமோடு முதவினும்
—–அன்பினோ டளித்திடாத வசனமென்ன வசனமே.

மனதில் அன்பில்லாது ஒருவர் மற்றவருக்கு இடும் சுண்டக்காய்ச்சிய பால், பசுவின் நெய், வேகவைத்த பருப்பு, முக்கனி, குழம்பு வகைகள், தாளித்த உணவு வகைகள், அப்பங்கள், திரட்டுப்பால், சக்கரை, சோறு ஆகியவைகள் நிறைந்த உணவு நிறைவையும் இனிமையையும் உண்டாக்காது.

அங்ஙனமன்றி, அன்புடனே, கெட்ட சோறு, பதங்கெட்ட குழம்பு, அரிசித்தவிடு, நொய்யரிசிக் கஞ்சி, புழு தின்ற கேழ்வரகு முதலிய தானியங்களின் மாவு, அறைக்கீரையின் வேர்(கட்டை), நீர்மோர், கெட்டுப்போன பால், தவிடு நீக்காத அரிசிச் சோறு, உப்புப் போடாத கூழ் ஆகிய உணவினை இட மனங்குளிர்ந்து உண்ணலாம்.